samedi 2 février 2013

بورقيبة ، تشي قيفارا والخليفة السادس

البلاد داخله في حيط ، فما شكون يستنى في بورقيبة باش ينقذ البلاد ، الأخرين يستناو في تشي قيفارا والباقي عاقد نوارتو في الخليفة السادس ، فما شكون خايف على حقوق المرأة ، وشكون خايف مل الرٱسمالية و إستغلالها للبروليتاريا ، وفما شكون خايف على الإسلام      من تأثير الغرب الماسونى الكافر 

 أما الزوالي إلي على خاطرو قامت عليه الثورة أمورو سانك سانك ، حد ما هو خايف عليه 

 الزوالي الي ضايع بين الأيديولوجيا ، ماهوش فاهم علاش القفة متاعو ماشية وتفرغ ! أش يندب بحقوق المرأة ؟ تي المرا معاتش لاقي باش يوكلها ، شنية بلوريتارا وهاذي ماسونية ؟ باش يزيدوه في الشهرية ولا باش يكبرولو صغارو ؟؟

 في دق الحنك هوما فاعرين : يلزمنا النقصو من البطالة ، يلزمنا نطورو البلاد..أيه أما كيفاه ؟ ..الله أعلم من كثرت مايتكلموا لغة خشبية ينجموا يحلوا حانوت نجارة ! عمركمشي سمعتو السبسي ، غانوشي و إلا حمة يقترحوا حلول صحيحة ، حلول عملية ؟ هات الكرسي و من بعد ربي يعمل دليل !! وفما شكون يستبله في العباد :باش يبني قنطرة لأطاليا ، الأخر باش يعمل نقل مجاني وباش يسكن في حي التظامن 
البارح في تونس وأنا نفطر  جاني راجل يحب يشيتلي صباطي ، راجل بطولو وطلطولو بو صغار ،يقرق باش يمسحلي صباطي ،والله حشمت ، قتلو خويا نعطيك وما تمسحليش الصباط ، وزيد ربي يعينك . العباد هاذوم نقدرهم ، ماعندهمش مرسداس كوشوها وقت بن علي ، ماهمش ياخذو في الملايين باش يكتبوا دستور ، ماهمش مصدرين يشربو في الروزاطه في سفارة أماريكيا ، عايشين من عرق جبينهم ، كي نشوفهم ونشوف السياسين متعنا نحشم إني تونسي ! هل المارك إنتخبهم الشعب ؟؟ تي الحاصيلو و من الأخر السياسين في تونس حالتهم * أصل    

Aucun commentaire:

Publier un commentaire